الدنيا أذا ضاقت فيك

تدري وش أحلى شي بالدنيا أذا ضاقت فيك انك تدور على اقرب شخص لك وتحكيله و تحكيله وهو يسمع لك وتقول كل ما بداخلك وتخريط عليه وتكرر إلي قلته وهو يسمعك ويقول والله صح ويسايرك ويأخذ ويعطي معك وإذا قلتله وش رأيك نطير قال نطير ولا يسألك كيف وليه المهم أنت تكمل وتنسئ موضوع الطيران وتدخل في موضوع وتطلع منه وأنت مكملته وهو ما يدقق بالعكس أنت الصح والناس كلهم غلط وشوي اشوي يأخذك من إلي أنت فيه ويرجعك لحالتك الطبيعية .............. بس المشكلة أذا ضاقت بك الوسيعه وما لقيت من يسمع لك وش تسوي ؟؟
أنا أقولكم وش أسوي طبعا أول شي احوس السديدات إلي عندي وادوار الأغاني الهادية *أغاني الحبيبة* وأمر اقرب محطة واعبي بنزين طبعا عارف انه في ناس بطونهم تعورهم ودهم يعرفون بكم عييت بدون ذكر اسما مثل فاقد وفا بس أبريحهم نعبي على حسب الضيقة لاتصدقون أعبي على حسب الميزانية طبعا الميزانية دايم مضروبة
من ضاربها الله العالم سامحونا على الشطحة نرجع للموضوع وبعد البنزين أدور طريق ماسددو فاتورة الكهربا له * مين يدفع فواتير الكهربا للشوارع؟؟؟؟؟ سوال وجيه* يعني طريق مضلم واشغل المسجل وتبدأ الرحلة بسرعة أربعين كيلو متر في الساعة وماسك المسار الأيمن والترايلات تشطفني ولأني داري عنها المهم أني بديت في التخيل تخيلت اني أصير كاش وعندي ذيك المشاريع وأطلق شي في خاطري أطقه ولا أشاور أول شي شريته الرنج روفر اسبورت بلأي متعقد من البنوراما إلي معي لاتصدقو قصدي الصني المهم بعد الرنج بديت أفكر في البيت وبعد البيت قلت أنا وش ينقصني بيت وموتر ودراهم وشاب مزيون
* مادح نفسه كذاب * معلينا قلت ليه ما أتزوج والله وبديت أمر على بنات الجماعة وحده وحده أدور وحده تستأهلني *أحلى ينا*
المهم مالقيت في بنات الجماعة وحده فيها المواصفات إلي أبيها* مو بنت موتر تبيها فل ولا نص فل *
طبعا أخوكم يبيله وحده مزينوه في الوجه أبيها تشبه سولافا فوا خرجي وفي طول الرقبة أبيها مثل أليسا والصدر صدر هيفاوالشفايف شفايف مرام الكويتية والطول طول اريام وشعر شعر زينب *طبعا اخسي ألقى هل المواصفات بس جايزالواحد يحلم *
المهم قلت أبدور برا الجماعة يوم فكرت قلت يا ابوالشباب كيف تخلي بنات جماعتك وأنت ادرأ بأخلاقهم وبإخوانهم وتروح للناس ماتدري وش وضعهم هم حقين رضاعه أخر أليل ولا أخلاقهم مع الناس وتعاملهم زين ولاشين وبعدين يا الخبل الحلي حلى الروح وبعدين الورد يذبل وما يبقى إلا ربحته يعني بالمختصر مالك إلا بنات الجماعة وخل عنك سولا فا واليسا و هيفا ومرام واريام وزينب تراهم كالهم متسبحين في طحين لو الوحدة منهم تغسل وجها طلعت الحفريات والتحويلات تقول انه طريق الشفا عندنا الوحدة منهم شكة دبوس انفجرت من كثر السيلكون الي فيها بالعربي كأنهم لوحات فنيه يا حليل بناتنا كل إلي فيهم طبيعي أن كثرو حطو الرواج وحياهم ما ينشرا ولا يباع وروحهم احلى روح بس والله والله أنهم يحطون جميع الوحات الفنيه في كمهم
المهم في إلا خير قررت إني ما أتزوج الحين وبعد التعمق في التخيل ما ادري الا انا اسمع

طووووووووووووووووووووووووووووووط
تريله اشطفتني وطلعت من التخيلات إلي أنا فيها واستوعبت انه

بدل الرنج صني

وبدل البيت غرفه وايجار

وبدل الرصيد في البنك رصيد بالسالب

والزواج بعيد عن خشتي .
بس في سوال يحوس في بطني إذا ضاقت فيكم الدنيا وش تسوون ؟؟؟؟؟