هذا هنا رقمـك والا اشتقـت دقيـت

هذا هنا رقمـك والا اشتقـت دقيـت

اشتقت لك يا ضـي عينـي وحنيـت
حنيـت ل ايـام اللقـاء والصـداقـه

يشدني شوقي اذا اصبحت وامسيت
لمشـاهـدة وجــهٍ ذبـحـنـا فـراقــه

هـذي رسالـه شفتـهـا ثــم فـزيـت
فـزت أسـيـرٍ حـيـن خـلـوّ وثـاقـه

حظنـت جوالـي بسـرعـه ودقـيـت
مـن شـوق قلبـي كـن فينـي طفاقـه

الـو الـو واهلـيـن ملـيـون هلـيـت
من فرحتي صوتي سكـت باختناقـه

قالت لي اهلن كيف حالـك ورديـت
الحـمـد لـلـه يــا أعــز الـرفـاقـه

دامك بخير وصوتك الحين حسيـت
قلبـي تطمـن بعـد طــول اشتيـاقـه

قالـت وربـي كــم ويـاكـم تمنـيـت
احصل على رقمك واعيـد العلاقـه

قلـت العلاقـه مستمـره بــلا لـيـت
ماتقطـع الفرقـى جـذور الصداقـه

قالت وش اخبارك مع قعدت البيـت
جاوبتـهـا حـالـي مـريــرٍ مـذاقــه

اقابـل التلفـاز والـنـت وازريــت
واخــاف جسـمـي يفتـقـد للـيـاقـه

قالت وش اخبار الشهادات كحيـت
قلـت الشهـادة كـل ابوهـا صفاقـه

دفنتهـا بيـن الـورق دفنـت الميـت
مـن عقـب ماصبـري تعـدا نطاقـه

بيـن الدوايـر والمـدارس تمشـيـت
زين القدم ثابـر علـى حمـل ساقـه

قالـت وانـا مثلـك بـعـد ماتهنـيـت
الحـال مـن حـالـك وبــان اتفـاقـه

قالت اقولك شـي قلـت ايـه ياليـت
قالـت افكـر فـي قــرار السـواقـه

قلت اسكتي مالـت علـى ماترجيـت
حسّبـت عنـدك سالفـه فـي رواقـه

سيارتـك تحتـاج بنزيـن والـزيـت
يعنـي زيـادة بالمصـارف طفـاقـه

قالت وجع امزح وانـا بـس حبيـت
انهـي حديـث الهـم واقلـب سياقـه

قلت ايه اشـوى بالحكـي ماتعديـت
كان انقلب شـوق المشاعـر خناقـه

قالت أفا ياضي شفتني اخطيت ؟
قلـت الحديـث يـشـد فيـنـا وثـاقـه

والا الخطا منك اقبلـه مـا توانيـت
وانتِ أساس الذوق واصل اللباقـه

قالـت علـى كلـن سعيـده وحسـيـت
بالصـدر راحـه تستثيـر انطلاقـة

اهـم شـي مـن بعـد غيبـه تلاقـيـت
مـعـك وجـددنـا عـهـود الـرفـاقـه

قلت اسعـد اللحظـات هـذي تمنيـت
والحـمـد لـلـه يـاأعـز الـصـداقـه

هذا هنا رقمـك والا اشتقـت دقيـت
باخـزنـه بـالـذاكـره والبـطـاقـه

قلت اسعـد اللحظـات هـذي تمنيـت
والحـمـد لـلـه يـاأعـز الـصـداقـه

هذا هنا رقمـك والا اشتقـت دقيـت
باخـزنـه بـالـذاكـره والبـطـاقـه

سلمت يمينك حبيب

ننتظر المزيد

مع خالص تحياتي

محمد الحريبي