من يعشق العليا للشاعر عبد الله بن فاهم

قصيدة بـــــــــاب الســـــــــهر
حيّاك في قلب ٍ غدا لسّهر باب
كيف المسا هادي و ينسج همومه
يرقب نجوم الليل كود ٍ له أحباب
غير الأماني غطته في غيومه
هاوي حلم و النوم لا شك غلّاب
ساهر أرق و الليل كسّر عزومه
الغد في يدّه معاليق و شهاب
لا طاح من يدّه يقطّع هدومه
عزمه وشم ما ينزعه سيف و حراب
من يعشق العليا ظلم إن تلومه
به عشق عاكف من عنا الحب ما شاب
كالطير عازم حول شوقه يحومه
كالصبح باقي للمشاريق جذّاب
كالعمر ماضي ما حد ٍ جا يسومه
كالحلم غامض كيف لا جمّع أصحاب
تأتي الحقايق بالمفارق ظلومه
يا فاتنه لبس التردد له أنياب
و الخوف لا تنزع ثيابك علومه
خلّك على النيّه تطالي بها أسباب
من قدّم الفلعه تقتله سمومه
لي صاحب ٍ بالأمس بالحب كذّاب
حتى الشهر لا جاه صعب ٍ يصومه
عايش حياته عيشة الذيب بالغاب
شايل عشق زايف خفا بالزحومه
كلما لقى بنت ٍ لَبس لِبس نصاب
بيّن لها حبّه كذب و بتخومه
حتى إذا طاحت رداة ٍ لها عاب
يحمل لها بالزيف اكبر خصومه
و الزيف لو يخفيه بالحب جلباب
يكشفه رب الكون ما له حشومه
لوني على الحدين بالحب منصاب
ما جيت طاعن من شكا لي همومه
اتبع كذا مسراي لو هالقلب ذاب
و أيزيح ذكر الله همومه و غمومه
يا راسمه حلمك غلا حرف بكتاب
لا تجرحي حرف ٍ أمل إن يدومه
لا تكسري شمس الضحى دونك أعتاب
قلب ٍ صدقك القول ما به عتومه
يوم الليالي كشّرت للهوى ناب
جا لك وفيٍّ ما غرس بك سهومه
شال الأماني صرح في كل محراب
ما حمّلك وزره بحرب و سلومه
ما قال ما بيها مدام الأمل غاب
ضمّد جراحه ثم ّ شمّر كمومه
حطّك عَلمْ بارز على ذيك لهضاب
لي شالها قلبه فخر دون حومه
بيت الشعر لو هو حمل لون وانساب
توّجت ببياتي قصور و عمومه
لكن كفو تكفي كذا غاية الشاب
لي يحترم نفسه و شعره و قومه